CALUMPIT, Bulacan (PIA) — Papapanagutin ni Pangulong Ferdinand R. Marcos Jr. ang lahat ng sangkot na kontratista, kawani o opisyal ng pamahalaan sa pagpapagawa ng hindi natapos, depektibo at pumalpak na flood control projects partikular sa mga barangay ng Bulusan at Frances sa Calumpit, Bulacan.
Sa Calumpit nagkakadugtong ang mga kailugan ng Pampanga at Angat na dumadaloy sa nasabing mga barangay.
Ang biglaang pagbisita ng Pangulo ngayong Biyernes, ika-15 ng Agosto, ay patotoo na seryoso siyang mapanagot ang mga nagsamantala sa mga proyektong pipigil o magpapahupa sana nang mabilis sa mga baha.
Base sa tala ng Department of Public Works and Highways (DPWH), ang proyektong dike sa Barangay Bulusan ay nagkakahalaga ng P96.4 milyon kung daan deklarado itong natapos na noong 2023.
Nadiskubre ni Pangulong Marcos na bagama’t ‘tapos na sa papel’ ang proyekto, ito’y hindi natapos dahil putol ang istraktura ng dike.
Dahil dito, tuwing tumataas ang lebel ng tubig sa Ilog Pampanga dahil sa regular na high tide, nagpakawala ng tubig ang mga dam sa panahon ng malalakas na bagyo o dumating ang back-flooding matapos ang mahabang pag-uulan, raragasa na papasok sa mga komunidad ang nasabing mga tubig dahil putol ang dike na sinasabing nakumpleto.
Sa tabi ng pinagputulan ng dike, nakita rin ng Pangulo ang isang pumping station na hindi na gumagana.
Ilang beses na rin itong nalubog sa baha na dapat sana ay magbobomba ng tubig palabas sa ilog. Ngunit dahil sa putol na dike, mismong ang pumping station ang nalulubog.
Ilang dekada nang nagtitiis ang libu-libong residente rito at sa paligid ng Barangay Bulusan dahil malalim at matagal na pagbabaha.
Sa kabilang bahagi nitong ilog, nagsagawa rin ng inspeksiyon si Marcos sa isa pang flood control project sa Barangay Frances.
Nagpadala ang Pangulo ng mga scuba divers na pinasisid sa ilalim ng Ilog Pampanga.
Dito napag-alaman na hindi na nakatuntong ang mga pundasyon ng dike sa lupa kundi sa makapal na putik na lamang.
Hindi rin ito itinayo sa isang kongreto na magpapatatag sana sa istraktura.
Dahil dito, maaaring magiba ang nasabing dike sakaling maging malakas ang pagragasa ng tubig sa ilog.
Nagkakahalaga ito ng P77.1 milyon base sa tala ng DPWH na iniuulat na natapos na noong 2023. (CLJD/SFV, PIA Region 3-Bulacan)
The post Pagpapanagot sa mga nasa likod ng palpak na flood control sa Calumpit, tiniyak ni PBBM appeared first on Punto! Central Luzon.