Kinumpirma ni Atty. Willie Rivera, legal counsel ng may-ari ng gumuhong under-construction building sa Brgy. Balibago, Angeles City na may mga quitclaim document nang umuusad sa ilang pamilya ng mga biktima ng trahedya.
Ayon kay Rivera, may ilang pamilya ng mga construction worker na nagmula pa sa malalayong probinsya ang napapirma na umano ng contractor sa quitclaim.
Gayunman, nilinaw niyang patuloy pa ang kanilang pakikipag-ugnayan sa naulilang pamilya ng mag-asawang vendor na sina Joey at Elsa Angcao, na kabilang sa mga nasawi sa insidente. Aniya, binabalak nilang bayaran ang funeral service ng mag-asawa at nakikipag-ugnayan din umano sila para sa burial assistance ng pamilya.
Hindi naman niya kinumpirma kung may quitclaim din silang ipinapapirma sa pamilya Angcao.
Nauna nang sinabi ng anak ng mag-asawa na si Jamaica Angcao na sila mismo ang sumagot sa malaking bahagi ng gastos sa burol at pagpapalibing sa kanilang mga magulang. Tanging tulong lang umano mula sa DSWD at personal na ambag ni Pampanga Governor Lilia “Nanay” Pineda ang kanilang natanggap.
Samantala, nilinaw ng Angeles City Social Welfare and Development Office (CSWDO) na may naging intervention ang lokal na pamahalaan sa funeral service na naunang nagbigay ng serbisyo sa pamilya.
Ayon pa sa CSWDO, may alok ding burial assistance sa pampublikong sementeryo, ngunit tinanggihan umano ito pamilya Angcao.
Patuloy namang hinihintay ng mga naulilang pamilya ang resulta ng imbestigasyon at ang pananagutan ng mga dapat managot sa gumuhong gusali sa Balibago. #
The post Quitclaim sa ilang pamilya ng biktima ng Balibago tragedy, kinumpirma ng abogado ng building owner first appeared on CLTV36.