1.
Ipamulat ta sa itamung pengari
karing anak tamu ining manang sabi
uling dakal no ring kayanakan ngeni
ring waring ala nang masabal kaniti
2
Itamung pengari ring dapat mituru
king pamanialita king amanung gintu
ipamisan tamu king isip da’t pusu
pakamal king sabi tamung katutubu
3.
Dinan tamung oras ing pamanantabe
karing anak tamu king ban lang misane
king pamanialitang amanung dalise
a karing dila ra dapat mung miyapse
4.
Pablasang ustung yan e tamu ayagap
pagsisyan tamu ngan karas na ning bukas
ustung ing amanu merakal ne salat
karetang katayang e karapat-dapat
5.
Ing pamanialitang Inglis o Tagalug
dependi ya karing kekatang karungut
nung metung tamu mu penibatang bakud
king amaung andam e ta mipamarug
6.
King Guinung miglalang ya iti menibat
pigkalub ne inyang gulpi neng isaldak
ing tore ning babel a bisang mangangas
a pakirasan ne itang banwang matas
7
e tamu pabustang lumbug ya’t mawala
amanung kaladwa ning balen tang mutya
lunto lang busabus ding kekatang dila
nung mitali la king amanung aliwa
8.
Inia, pengari ning indung Kapampangan
saup saup tamu ban ding kayanakan
akayabe ta lang magmasusing myuman
king aldo masampat ning amanung siswan….