1.
Kapilan man e mepakdal ining diwang kukulate ,
King baging ning pamagdulap ba keng dasnan itang pake.
Tutung dakal a sumbagal selugsug ning pamibule ,
Ing alun ning dayat malat tepus na ku ketang lele.
Gagalgal ya ing katawan ketang dimla na ning Nieve
Mibaya ing kapagnasan milarawan yang tagumpe.
2.
Balang poetang mibait king taldawa ra ding watas ,
Ginulis na ning Meniaklung ing calma rang maging bukas.
Tagumpe man at kabigwan madawag man itang daklat ,
Isangi ra ing dalumdum ning limputang maging pisak.
Ban kanita itang lugud king amanu yang milablab,
Mipakde lang kayanakan king matarling a gulisak.
3.
Ngeni balen saksi tamu tengalan ding adwang mata ,
Deng lanubung kayanakan daralit no detang pluma.
Susulat la at tatalbug amanu ing babandera,
Ing labwad tang kapampangan maging bagyus yang agila.
Ing bilungang mengayagtal anggiaman king daratang pa ,
Ing probinsyang Kapampangan yang kuta ding Majadlika.
4.
Ing amanu tamung siswan luguran ya ing marapat ,
Yang dila ra ding bayani at simbul da ding Mardikas.
Ing pluma rang mangundiman ding daralit tamung watas,
Kasing lambis ding dalagang bayung gising istung abak.
Reynu de ding sablang Reynu ,mipatampuk sari katas ,
Yang ardin da ding dalagang sing banglu ning bayung abak.
5.
Dapot ing bie keting yatu daratang ngan ing sibukan,
Ing ligaya ning penandit aldukan ne nitang siwal.
Mekad iti magaganap ban masubuk ing tetagan,
Detang balang pamuntuk na ning nanumang katatagan.
Ing masakit na mung diling sisilab king kaisipan ,
O’ bat iti yang tutubu king berde tang kaparangan ?
6.
Nung tula ra ding kabalen lagsakan de ing amanu .
Mekakeni o Poeta dakdakan me ing salu ku,
Ing sundang ning kataksilan bangalan me ing pusu ku ,
Balang daya nang tulabsik kamatayan ning amanu.
Deta namang bayung Suli Talakad ko at maglualu ,
Kapilan man e tulutang masintang ya ing amanu.
7.
Kasebyan la ding Poeta timawa la kaisipan,
Ing lugud da king amanu alang sukad a lulanan.
Deti e la tapuk-tapuk king lagyu ning katuliran,
magmaratun ketang tutu , marangal dang pilubluban.
Ban kanita itang banwang malugud dang salilungan,
E maglambung …E magkambil…king Ulas na nitang lulam !!!!
PL BIENVENIDO C. YABUT