1.
Gumulis iang pasibaiu ing gagalgal a paniulat ,
Qng annggiamang pacang na la ding taliring mamulicat.
Tipunan co ding amanu qng gubat na ning pagsalbat ,
Ban milablab maglipatu ing pauaga at paninap.
Careng baiu tamung supling linual na at linibutad ,
Ban sumlag ia ing amanu qng cundiman ning paniulat.
2.
Ing pluma ning diuang maliap misan ia pang maglipatu,
Quetang babo ning alapap isunis co dening bersu.
Qng lauiuing Capampangan gintung nota ding amanu ,
Qng taldaua da ring uatas a cuta da ding Lauriadu.
At queni la macasale detang matas a talindo ,
Ding lira dang titigtigan ilang Alpha ning Olimpo.
3.
Matula iang labuad tamu anti wareng matuang Tipan,
Uling sablang matenacan queni bucud menibatan.
Api waring milalablab qng busal na ning limputan ,
Qng caguiang papalto ra ning masusing pamagaral.
Ding aguman at eskuela balitang la at ukiatan ,
Nung nucarin mapapande mala-guintung caisipan.
4.
Ing Indu tang Capampangan titiman iang magumasid ,
Ding anac nang baiung sibul magumpisang babalikid.
Ing amanung madadamul lalam na ning banua’t sulip,
Tinali la at miglualu matibe pa careng tindig .
Gererung lang linubutad qng parang da detang lasip
Uauaguag de ing bandera qng acbung a balang suldit !
5.
Macadalamat qng pusu ra ing lugud da at pacamal ,
Qng amanu ding Mardicas ,ing amanung Capampangan.
Manibat pa queti luzon ,qng Aparri at Cagayan ,
Guintung bining macasalbag ing salita ding majalan.
Cabang ating banua’t sulip at dagat ning calibudtan ,
Capilan man e mitulut patdan de ing sari leguan.
6.
Cabang ating tala-sulat ‘ting poeta’t poetisa ,
E mate ing Capampangan a dila nang Panday Pira,
Uling sablang balen tamu lalauigan at probinsia ,
Batuin ne ning catapangang macaduquit qng bandera.
Ania naman acung ini anggang binit cung pauaga.
nung mate iang Capampangan mitaclub ne iting banua !!!
PL BIENVENIDO C. YABUT