1.
Bie ding pulitiku ngeni patye ila nang milukluk
abilang mo keng taliri retang tapat ampon subuk
e la paysaul keng tuksu at king sistemang mabuluk
karing korap ampon sakim, ilang duwi ra at suksuk.
2.
Atin naman pulitikung ila-ilang liwas-liwas
ketang nasa rang pusisyun angyang labag pa keng batas
lakwas pa nung kakampi re’t kasapakat ing pun matas
agawa reng abaluktut ing batas king Pilipinas.
3.
Retang pulitikung tune a kakampi keng Katutuan
tuturing da lang sumbagal at masipit dang kalaban
gawa ra lang pisasabian nung e ra la anabangnan
dalum do pa opisina na ning Sandigan Balayan
4.
Oini pa ing makalungkut uli na ning teknoloya
dakal no retang bayaran a biasa keng social media
Ing pagobran da kasiran at pipate la reng masa.
‘no pang kabiasnan manyulsul kareng mas matas karela.
5
Anya pakisuyu kumu keka mangmang a botanti
maging mulat naka sana kareng pulitiku ngeni
sakaling mika-alalan e mune sa’ pamisali
Ing dangal mu at prinsipyu king taung mapagkunwari.
6.
Nganing Kasebian Katutuan itang maki-kasalanan
karetang binotu tamu king matas a katungkulan.
kalibe ning pangaku ra kambe nitang limang dalan
balang buntuk king pamilya mika-obrang pangkabiayan.
7.
Nung ginamit da la sana keng Kontra albug reng pondu
at nung kinontran da lamu reng ilegal a magtutrosu
lakwas ding Large Scale Mining kareng bunduk katutubu
Itang atyu karing Low Lands e ta sana apektadu.
8.
Tuglungan ke pa sana ining aba kung istorya
king milyaring kalamidad e mu keti king Pampanga
pauli ding manungkulang paka-barung at kurbata
ding Trillion Peso Fund Kontra Albug pirakayan da la.!
POETA OJIE PENA