1.
Ika’ing Poeta Laureadung malambat kung akayabe
karing balang koronasyun Masantul at Macabebe
anak ku pamung maintang mikilala ta nang tune
uling maralas kang mamapa king kekeng pibale-bale
laureado kang de-kalidad kabud ika ing ginale
ing swala mung lilindayug pibuburyan ding manalbe
2.
Metung kang mayap a kawal ning mahalan tang amanu
a kakabas ding minunang meging ari ning parnasu
angga king panaun ngeni e kinupas ing lugud mu
king amanu, tradisyun at kultura ning balen tamu
at ding anggang sinulat mung kawatasang makabersu
matalustus lang daragus, malinatnat la’t mapinu
3.
Ining bage simbitla ku basi ya king karanasan
king panaung kayabe keng mangorona king Telacsan
ustung ya na ing ginale alang samut kalaraman
mabie la diwa ring tau kukurug ing palakpakan
pelalung ding prinsesitas ampon reyna ning kabengian
ustung ilang pemurian na gigigik la’t manigalgal
4.
Ketang pelikulang ari mibulalag ing lagyu na
a kayabe na ning reyna ning tradisyun at kultura
bista’t man meangu ne bie’y imang Ofring dela Pena
midalamat nala lagyu king mabilug a Pampanga
e mu bilang matenakan a laureadu at laureada
antimurin naman bilang batukan a zarsuelista
5.
i PL Francisco Guintu karas naman king crissotan
e ya matras nanu ya mang tema itang pisasabian
uling malwat neng poeta at kukudtang kawatasan
e ne lalto man kilabut sane neng makibadbaran
katilpu na ing balas na nung wari king makilaban
e ya mu rin mag surrender angga na king katatawlian
6.
Iniang kayang katalasan ding puputungan nang reyna
neng masanting yang lalaki manulu la wawa kaya
mekad nung e makabante ing malagu nang asawa
kayari ning koronasyun yagkat deng mamusitara
nung ikit ye mu’y tatang frank iniang anak anak ya pa
agiang i Phillip Salvador e ya tumud mang balandra
7.
Akamdemyang Kapampangan puge ampon pasalamat
king kekong pamangilala king kagiwan nang tatang Frank
ding kapara kung laureado a tinagun ngening abak
pagkalub da naman kaya ing kapuriang pekamatas
uling makuswelu kami king galal a kayang tinggap
ala keng balung pagkalub nun e’ing matni ming palakpak